Agur t'erdi,
Dakizunez, Jon Barberena baztandarra udazken honetan joan zitzaigun. Olerkari gaztea irailaren hasmentan zendu zen, ondoezak jota, lagun guztiok aho bete hortz, eta bihotza bete samin utzirik. Bergarako Idazle Eskolan ibilia zen Jon, eta Tere Irastorzaren ekimenez, Jon Barberena zenaren omenezko ekitaldi xume bat eginen da Bergaran, abenduren 14an, eguerdiko 12etan. Izoztu zitzaigun negu hura, Jon Barberena gogoan deitu diogu ekitaldiari. Izan ere, Jon Barberenak Nafar Ateneoraren eta Iruñeko Udalaren artean antolatutako Iruña Hiria saria eskuratu zuen Izoztu zitzaigun negu hura liburuarekin. Liburuko poemak irakurriko dira Bergarako ekitaldian. Ekitaldia irekia da eta Jon Barberenaren olerkiez landa, kantuak, dantza, koreografia eta bertze eskainiko dira. Bergarako UNEDen dugu hitzordua, San Martin Agirre plaza, 4.
Bergarako ekitaldia
Bergara,
abenduak 14. Eguna heldu da. Eguerdiko hamabietan, UNEDeko aretoan,
Idazle Eskolak omenaldia eskaini dio bertako ikasle izan zen Jon
Barberena Ibarrari, bertan Barberenak graduondokoa lortu baitzuen.
Aurretik, Kirol
Hezkuntzan diploma
eta Kultura eta
Gizarte Antropologian
lizentzia eskuratuak zituen.
Kultura
alorrean bertsolaritzan jardun zuen lehenik, eta 2004. urtearen
ondoren zenbait txapelketetan parte hartu zuen; Nafarroako bertsolari
txapelketan, 2007 eta 2008 urteetan txapeldun-ordea izan baitzen.
Olerkigintzan, ere, aritu zen Barberena eta bi sari irabazi zituen:
2016an “Iruña hiria” Nazioarteko poesia saria —Izoztu
zitzaigun negu hura—,
eta 2018an Mungiako Udalaren Lauaxeta olerki sariketa irabazi zuen
—Neguko gaba—.
Bertsolaritza
eta olerkian biziki aritu zen Barberena; horrez gain kultura ekintza
ugarien bultzatzaile izan zen. Aldi berean bere hitzak Nafarroako
zenbait hedabideetan irakurri izan dira.
Kultura
eragile honek Bergaran jaso du omenaldi xume bat, eta Idazle
eskolaren izenean eta Nafar Ateneoaren izenean, bertan Tere
Irastorza, Josu Jimenez Maia eta Itziar Gomezek azaldu zieten
bertaratutakoei nolakoa izan zen Jon Barberena. Ondoren, egungo
eskolako ikasleek, zenbait ikasle ohik eta letren munduko beste
hainbeste pertsonak, asko elkarren ezezagun izanik ere, Izoztu
zitzaigun negu hura
izena daraman liburuko olerkiak irakurri zituzten. Irakurraldiaren
tartean Julio Soto bertsolariak bertso batzuk kantatu zituen.
Sarrerako hitzetan Josu Jimenez Maiak Jon Barberena nor izan zen
aipatzerakoan, gogoratu zuen letra munduko langile eta sortzaileek
duten lankidetza. “Testu perfektua idazterik ez dago, perfekzio
bera ideal hutsa delako. Idazleak bere buruarekin negoziatu behar du
idazlana, itzultzaileak idazlearekin, zuzentzaileak idazlearekin.”
Hori adierazten omen zuen duela hamar urte hil zen Iñaki
Ugarteburuk, berrogeita hamazortzi urte baizik ez zuela. “Eta
olerkariak?”, galdera egin zion Jimenez Maiak entzuleari. “Norekin
negoziatu behar du olerkariak?”, berretsi zuen bere galderan. “Joan
Margarit katalanak dio poesia literaturarekin baino musikarekin behar
dela lotu… Poesia horixe baita, musikaren eta literaturaren arteko
hibridazioa… Poetak orduan, isiltasunarekin beharko du negoziatu.
Norekin, isiltasun anderearekin ez bada?”
Geroago
“finean, poesia, isilune andana bat, egoki txertaturiko isilunean
baino ez da” azpimarratu zuen Jimenez Maiak eta amaitzeko gogoratu
zuen: “paradoxikoa bada ere, Jonen poemak errezitatzerakoan,
isiltasunaren apologia egiten dugu”.
Ekintza
xume honekin Jon maite zuten guztiekin bat egin nahi izan dugu;
lortzen badu Maiderrek, Garoak Adeik eta Jonen gertuko guztiak
pairatzen duten une latz eta zail hau askoren artean partekatuta
dagoela azaltzea, edo zertxobait arintzea bederen, balio izanen du.
Testua: Sabin Oregi
Irakurraldian parte hartu zuten: Amaia,
Mikel, Mikel, Iraitz, Tere, David, Juantxo, Julio, Matxalen, Ainara,
Arrate, Lierni, Aintzane, Isa, Lauri, Gure, Ines, Josu, Sabin eta
Itziar.